आफूलाई थारु नेता भन्ने, थारुको नाममा पार्टी चलाउनेहरुले पनि नाकावन्दीको समर्थनमा जनता छन् भन्नु हासोलाग्दो कुरा हो । नाकावन्दीको समर्थन गर्ने काम जनताले गर्छ ? भारतले लगाएको नाकावन्दीको समर्थन गर्ने थारु जनता उनीहरुले कहाँ देखे ? कहाँको थारु जनताको कुरा गर्दैछन् उनीहरु ? थारु या मधेसी समुदायका जनताले मात्र होइन, कोही पनि नेपाली जनताले आफ्नो देशलाई नाकावन्दी गरिँदा समर्थन गर्न सक्दैन । नाकावन्दीलाई थारुले समर्थन गरेका छन् भनेर उनीहरुले थारु समुदायप्रति नै गद्दारी गरेका छन् । जनताको नाम जपेर आफूले जे गरे पनि हुन्छ, देश बरबाद पार्न विदेशी गुहारे पनि हुन्छ भन्नु देश र जनताप्रति अपराध हो । यस्तो अपराध कसैले गर्न हुँदैन ।

देशलाई संकटमा फसाएर कस्तो राजनीति गर्न खोजिएको हो ? उनीहरुले अब स्पष्ट पार्न जरुरी छ । जनता उठेर यस्ता आन्दोलनकारी नेताहरुलाई तिमीले देश बरबाद पारेर, जनतालाई भोकै मारेर के गर्न खोजेको हो भनेर सोध्नुपर्छ । थारु समुदायको समेत नाम बेचेर सीमित दलका सीमित कार्यकर्ताले चलाएको आन्दोलनलाई समर्थन दिएर भारतले ठूलो गल्ती गरेको छ, थारु समुदायको विश्वाश गुमाएको छ ।

अब नेपाल र भारतको सम्बन्ध बिग्रन दिनु हुँदैन । आन्दोलनको नाममा नेपाल भारत सम्बन्ध बिगार्ने धेरै देखा परेका छन् । जनताले नै नाकावन्दी गरेका हुन् भन्ने नेताहरुले नेपाली जनताको प्रतिनिधित्व गर्दैनन् भन्ने भारतले बुझ्न जरुरी छ । नाकावन्दीको समर्थन गरेपछि र नाकावन्दी लगाउन भारतलाई सहयोग गरेपछि आन्दोलनकारी नेताहरुले अलिअलि भएको जनविश्वाश पनि गुमाइसकेका छन् । अब भारतले नेपालको बास्तविकता बुझ्ने र कूटनीतिक सम्बन्ध सुधार्ने काम गर्नुपर्छ । आन्दोलनकारी दलहरुले पनि सहमति गरेर अगाडि बढ्नुपर्छ । यसरी जनतालाई दुख दिने र देश बरबाद पार्ने काम कसैले गर्न हुँदैन ।

देशलाई विपतमा फसाइएको बेला जनता एकजुट भएर अगाडि बढ्नुपर्छ ।

पूर्वसभासद एवम अभियन्ता शान्ता चौधरीको फेसबुक बाट !